2013/04/28

城中熱話。麥麥開飯麥趣飯!

上星期獲麥當勞邀請出席「麥麥開飯試食會」,老老實實,新推出的「麥趣飯」或「麥飯卷」都唔係我此行最大目的,只因公關人員說會邀請官恩娜做嘉賓,我就第一時間答應了 XD


結果,當晚出席的原來只得周柏豪 Orz......

提起周柏豪,除了那名震高登的玻璃杯論外,我只醒起他和鄭融合唱的作品《一事無成》,想不到真人相當識做,作為麥當勞的宣傳大使,當然要讚下麥麥開飯,但佢唔會講:「我好鐘意食飯」、「個飯真係好好食」此等空泛對白,反而識代入真實生活:「錄完音,三更半夜都仲可以食個飯,真係非常好」「有粟米、有西蘭花,夠健康!」,臨場反應極佳,真係有少少鍾意左佢。


進入正題,麥趣飯,又稱麥麥開飯分別有燒汁牛肉及板燒雞扒兩種口味,說真的,我差點以為這是麥當勞與 OpenRice 開飯喇網站 crossover 的產物。


我們懷著緊張心情先試「板燒雞麥趣飯」打開飯盒後,當堂舒了一口氣,因為賣相比網上流傳的公整多了,西蘭花和雞肉比例為一半一半,飯的份量雖然唔多,但我估計大家去食麥趣飯都係旨在試下味,這應該不是問題吧。
 


「麥趣飯」刻意加了粟米在內,營造健康感覺,但粟米的數量實在唔多 (口痕友:「一定唔夠同期糖妹推介的那個粟米牛肉丼多啦!」),但飯的質感並沒有想像的爛,混上醬汁後,都幾易入口的,絕對好過飛機餐/雞記的飯底。
 


主菜方面,板燒雞扒即係板燒雞扒包個塊板燒雞扒,大家有食開麥記,水準如何應略知一二,反而要留意的是醬汁味道太甜,平時食包唔多覺,但今次撈落飯度食就很明顯了。
 



另一方面,燒汁牛肉即係雙牛芝堡入面個塊牛肉平時放塊牛肉入口,由於有包有配料一齊咬,感覺還可以的,但這次單吃塊肉,其肉質之粗嚡立即表露無遺......


無可否認,成個飯最好吃的是西蘭花

而這個西蘭花,亦是麥記餐牌上,除沙律外,唯一的蔬菜選擇,值得支持!


跟「麥趣飯」相比,同樣有兩款口味的「麥飯卷」並未獲太大注視,其實不論外形和味道,「麥飯卷」都比「麥趣飯」更加討好,口感軟韌的卷皮內,究竟包著甚麼材料呢?


打開飯卷一看,原來內裡是一個切半了的米漢堡,再夾附脆雞/牛肉、番茄、青瓜及生菜等配料,難怪一咬下去甚具層次感。無論是牛肉配照燒汁、抑或脆雞配沙律醬,味道也相當不錯的,很開胃,值得一試!

心裡有一個想法,如果「麥飯卷」和西蘭花可以由上午十一點起供應就好了。


最後有一個疑問。

我印象中,麥記早在我中學時代已供應過凍檸茶,跟餐加兩蚊就得,我不時幫襯的,因為一來喜歡慢慢篤,二來覺得飲檸茶比飲可樂更健康,只不過其後被雀檸所取代,我就兩蚊都慳番......

奇怪係,點解麥記今次宣傳到個凍檸茶「前無古人」咁既呢?

Anyway, Welcome Back!

沒有留言:

發佈留言

LinkWithin

Related Posts with Thumbnails