2013/03/21

嫁喜雜項(一)。餅卡篇


婚禮距今還有大約半年時間,如果用賽馬述語形容的話,就係「馬匹正轉緊入直路」,我們的籌備工程開始時很順利,但當要訂要約的都已做了,就開始有點呆滯,除一直「散盡家財式」付訂金外,還可以做甚麼呢?

全靠美心對外宣佈有意將餅卡價格提高,我們才知道餅卡「早買平幾舊」,但入婚紗展 shopping 之前,問題來了,究竟要買幾多張餅卡?買邊一間好?甚至乎,係咪一定要買餅卡?

問題一。買幾多張餅卡?

我問過身邊的已婚朋友,他們的餅卡數量各有分別,有的買 200 張以上,有的 60 張夠晒數,豐儉由人。其實餅卡數量,主要取決於女家,女家請幾多人飲?派唔派餅卡比街坊?絕對影響餅卡的最後數目。換句話說,大家應該先準備好出席飲宴的賓客列表,從以計算所需的餅卡約數,再預 20 張餅卡做 buffer,相信便能足夠應付。萬一真係唔夠,仲可以去教協補倉 =p

問題二。買邊一間好?

市場上餅卡選擇不少,以代言人計,就有智霖 BB、心悠 BB、品味陳豪、AKB BB 等,當中最大路的當然係智霖 BB,勝在分店夠多,又能換一打餅......

口痕友 A 立即插咀:「Cheap 餅咋喎,我無食好耐啦!」
口痕友 B 回應:「你咪理,街坊親戚們就係貴多不貴精,十二件餅先係夠得體,比張 50 蚊東海堂現金券佢,換得個三件半餅,都唔知加唔加錢要埋個半件好!弄巧反拙!」

其實情況就好似 CCTVB 劇,你要另類如《天與地》,可能會吃力不討好,但適當地是是但但,《花家姐》都有 30 點收視,你會點揀?

問題三。係咪一定要買餅卡?

如不想買餅卡,可以點?坦白講,我考慮過買星巴克咖啡券,或以靚餅 (如 Tony Wong) 招呼女友同事或朋友,我覺得佢地會喜歡吃一件靚餅,多過吃一打 cheap 餅,但其後發現執行上很有困難,情況就好像把「買幾多張餅卡?」的問題,硬生生擴大至「買幾多張咖啡券?」和「買幾多件餅?」真係諗起都頭痕,還是直接以餅卡解決好了,哈哈!

 (特別鳴謝:代為報價的食友三叔和同事 Viola)

沒有留言:

發佈留言

LinkWithin

Related Posts with Thumbnails