2012/10/19

UCC Coffee Shop。愛窩夫,愛 UCC!

如果大家眼利的話,應該留意到最近我和女友突然窩夫癮發,連續幾篇 blog 文都有窩夫出現,要好好滿足一下其實不難,去 UCC 就得啦!

UCC 其實不用多介紹,早在十幾年前曾經雄霸 Sogo 百貨,當時每隔數層就有一間分店,很誇張,今時今日聲勢滑落,隨著尖沙咀新世界中心店結業,銅鑼灣廣場分店是比較就腳的一間。晚市點任何主菜,加 $35 即可轉成套餐,包括 salad bar、餐湯及飲品,以主菜平均 $7x - $8x 的價錢來計,人均 $120 左右已經可以吃飽飽,性價比極高,當然不可不提名物窩夫,時下甜品店兩塊窩夫賣近 $40,這裡一客四塊窩夫只是 $44,教我如何不愛它?


沙律吧亦是不可錯過的一環,選擇雖然不及 N 年前的 Pizza Hut,但放滿薯仔沙律、車厘茄、粟米粒、一黃一綠方型啫哩,視覺上仍然震撼,不過砌沙律時記得唔好眼寬肚窄,特別是薯仔沙律,很頂肚的。


餐湯是忌廉湯,味道沒特別的,湯比較稠身,是過客。


本來我們打算 share 一個餐,再加一客窩夫,但點主菜時就知道此想法不可行,因為我必定會點女友不愛吃的焗咖喱牛肉飯 ($77)。點解女友唔鍾意食?因為係用白汁焗的!這飯奇妙之處在於飯粒本身有咖喱香,味道跟重重的白汁相當合拍 (強烈建議吃前加些芝士粉),牛肉質感乾乾的,其實是雞肋,反而薯仔和甘筍粒更好吃,不過這始終是我的童年回憶,唔擔保你會和我一樣咁喜歡 XD


女友點的香草鮮蝦意粉 ($80) 也不賴,蝦肉夠爽,意粉夠香,也不會煮得太過火,保留了一點彈性。


此行的最大目的,窩夫,例牌點香蕉朱古力 ($44), 要留意 size 有大小之分,大有四塊窩夫,小的只得兩塊,價錢卻只差 $8,相信大家都識點揀。窩夫表面灑上糖霜,再淋了朱古力醬,旁邊是朱古力雪糕、百力滋及香蕉,賣相十年如一。我喜歡將朱古力雪糕放上窩夫面,再同放入口,感受那一冷一熱的刺激,這晚一人吃兩塊,真的很滿足,我相信下次再來 UCC,都係為了這窩夫!

UCC Coffee Shop
銅鑼灣軒尼詩道489號銅鑼灣廣場一期2樓

沒有留言:

發佈留言

LinkWithin

Related Posts with Thumbnails