2012/06/07

彪哥海鮮菜館。六月飯友生日局

六月七日,好朋友兼好兄弟又大一歲,響度先講聲生日快樂!


上周日晚,一行十二人齊齊為他慶生,地方選好了觀塘的彪哥海鮮菜館,彪哥原名蛇王彪,最出名的當然是蛇羹和糯米飯,但大熱天時沒理由點這些,就簡簡單單叫點小菜好了。


先來兩款燉湯,分別是大白菜燉豬肺湯 ($88) 和竹笙響螺燉雞腳湯 ($108),前者味道很清甜,湯料則以豬肉和大白菜為主,豬肺反而不多,搵極都只係得一兩粒,唔太夠喉;後者材料十足,湯底清澈鮮甜,入口帶點膠質的感覺,不錯。


據講童年白切雞 ($150) 是這裡的招牌菜,阿姐介紹時仲話「連金剛都讚好」, 原來說的是上年的《街坊廚神》。白切雞皮滑肉嫩,肉地不肥,沾些薑蓉會好吃一點,但坦白說味道不是那麼神,千萬不要抱太高期望。


砵酒焗蠔一人一只,每只 $30,說不上便宜,揭開錫紙不特別香,幸生蠔尚算肥美飽滿,否則真係會呻笨!


點了焗蠔,就不要同樣逐只計錢的蟶子王了,來碟豉椒炒蜆吧。 豉椒炒蜆性價比絕對高於剛才的砵酒焗蠔,一碟只是 $68,蜆肉本身夠鮮甜,豉椒炒就更加惹味,又無死殼問題,絕對收貨。


每次吃小炒,總離不開一碟椒鹽鮮魷 ($72),彪哥的出品勝在炸粉不厚,夠香口,但就稍欠一點椒鹽味,及不上新填地街的文記。


生炒骨 ($116) 叫了中碟份量,肉質外脆內鬆化,味道偏甜少酸,挺開胃的。


魚香茄子煲 ($46) 是壽星佬最喜歡吃的小菜,貪其好下飯,還記得阿嫂交帶落,佢最鍾意食中式牛柳同魚香茄子煲,所以我每次食飯都會點其中一款的。


藥膳浸莧菜 ($78) 下了不少明目的杞子,菜吃起來挺嫩口,湯汁鮮甜,藥材味沒有想像的重。


事前不知道香港炒飯 ($88) 是甚麼東東,表面看是普通的蔥粒蛋炒飯,食落先知薑味幾重,飯粒炒得乾身,叫一大碟十二人分,抵過叫白飯。


姍姍來遲的千葉豆腐 ($116) 賣相非常精緻,中心位放有銀杏、青紅椒及菇粒,想不到是這等大檔的出品。坦白講,此物遠睇誇啦啦,一食入口其實沒甚麼特別,未至於好睇唔好食,但賣相的確是最大的賣點。


最後追加的家鄉煎藕餅 ($58) 完全是個反高潮,藕餅燶身,黑漆漆的表面一睇就知過晒火位,好食有限。


連同茶芥酒水,位位百二至百三的價錢,不貴,但水準及不上最近吃過的金源小館,或許蛇羹會好一點,冬天時再來搵彪哥試試。

彪哥海鮮菜館
觀塘宜安街4號P-Q號舖

沒有留言:

發佈留言

LinkWithin

Related Posts with Thumbnails