2012/01/23

大飽口福。龍年首篇「開年文」

今日係大年初一,搵食先恭祝各位朋友新年快樂,最緊要身體健康,日日有食神,龍年的首篇食評,一於以「大飽口福」開個年!

位於銅鑼灣伊利莎伯大廈 2 樓的大飽口福新近開業,號稱全港最大的自助餐的專門店,以大量海鮮食材作招徠,龍蝦、鮑魚、海魚、翡翠螺、瀨尿蝦、鵝肝等日日新鮮直達,晚市價錢星期一至四 $268,五至日 $398,價錢比不少酒店 buffet 還要便宜,相信是其吸引力所在,事實係咪真係咁抵食呢,以下是我當晚的親身體驗...


上星期四晚,預訂了 7:30 PM 的二人座位,早十分鐘前來到,門外卻大排長龍。本以為有訂位的不用排,事實卻是殘酷,我們按指示排在人龍之末,期間沒人招呼,也沒有拿票叫號的安排,人群只可緩慢的前進,結果足足排了二十分鐘,終於見到大門口。我們看著店員用大頭針對著密麻麻的座位圖,當時情況其實都幾惹笑,究竟佢知唔知自己拮緊邊個位置呢?


由店員引領下,我們進入了面積達 28,000 平方呎殺戮戰場,環境尤如一個大型美食廣場,人頭湧湧的,幾經辛苦終於找到了座位。店員隨即發放四顆「紅鑽」,「紅鑽」在這戰場是十分珍貴,十分重要的,想食龍蝦鵝肝?就得靠這些紅鑽換回來了!


第一步,是拿著號碼牌去 order 蒸魚/煎魚,但眼前的人龍卻是三合一的,分別排蒜蓉龍蝦、白灼海鮮及蒸魚/煎魚,由於現場無人維持秩序,大家漫無目的左穿右插,當時根本唔知排緊乜野。「魚檔」應該比較清閒,因為只負責接 order,再拎魚去蒸或炸,但由於客人太多,以至廚房應付唔來,結果聚集了很多人在「魚檔」前投訴 - "要我等幾耐呀?五分鐘後又五分鐘,蒸條魚要幾耐呀?”,很「無間道」的對白,哈哈!


我出盡奶力把手上的號碼牌塞給「魚檔」師傅,求其叫一條蒸,一條炸,或者師傅見我排足半小時都無野到肚,順手給我一碟豆豉粉絲蒸扇貝,皇!恩!浩!蕩!,我當時真係感動到爆。

拿著扇貝,繼續排隊拎蒜蓉龍蝦,永無止境的排隊,令我心灰意冷,唯有同友人大玩 SMS,以下是當時的對話內容:

我:唔知自己排緊乜,哈哈!
友人:根本 refill 唔切,是我見過最嚴重有問題的自助餐
我:一陣食燒臘點心好了
友人:我頭先去拎都無晒!
我:有走人的衝動!
友人:I feel the same 食少少龍蝦同魚先囉,頭先見到農夫個位 C 君都響現場!
我:係?
友人:聽到佢講左句,「我係唔會就咁屈服既~」


事已至此,本來我都唔想再逐點批評,但有一件事情實在不吐不快,現場有一部自助汽水機,好方便係咪?但偏偏有汽水機無吉杯,身旁的食客去水吧問店員拎隻杯,你估下店員點答?佢話:「無架,我地唔會比杯人,要飲你要排隊拎!」結果,部份人要用甜品碗盛汽水,嘩,情況真係慘無人道。我明白店員當時做到踢晒腳,但係用咁惡劣態度應客,完全係一個大!悲!劇!


當晚試了兩款龍蝦,分別是蒜蓉龍蝦及鐵板龍蝦,前面肉質偏霉,並嘗試以大量蒜蓉和粉絲覆蓋弱點;後者明顯好得多,特別是龍蝦鉗內肉多味鮮,問題是你要花上大量時間在鐵板燒前守候。


鐵板區另有一款即煎鵝肝,跟龍蝦同屬「紅鑽級美食」,但一入口不但沒有肥美感覺,油溢味還很嚴重,當時只想到四個字,就是粗製濫造!


即蒸點心拎唔拎到視乎彩數,因為點心一出即被人掃光,我好好彩拎到一籠燒賣,感覺就好似利物浦贏英超咁興奮 (咪住先,我好似從未感受過這份喜悅...)。


刺身有三文魚和吞拿魚兩款選擇,花了十五分鐘才拎到四片吞拿,入口粉粉的,而且餐具只得刀叉提供,用來食刺身實在古怪。翡翠螺也是極受歡迎的食物,友人「三顧草蘆」才拎到一碟,我一放入口卻全是沙,仲有未溶晒雪的感覺,吐都吐唔切,好恐怖!


還記得一開始時 order 的魚嗎?煎大眼雞半小時後呈上,但明顯不是煎,是用炸的,但有得食已經好好,蒸的那條個半鐘後才送來,究竟用左幾多個「五分鐘」?


九點打後人潮開始散去,用餐時段剩餘不足半小時,是時候出動補給了,但拿到的都是雞中翼、雞全翼,牛腩,紅腸,白灼菜心雲吞等普通貨色...放心,向好的方面去諗,絕對夠飽肚!


自助餐也不是沒有亮點的,來自瀰月屋的甜品沒有讓我失望,嚐了最馳名的軟葛糍及玄米奶凍後,心情總算好了一點...


來這裡,真的能大飽口福嗎?我吃完只感到徹底的無奈,最慘係另一位朋友仍希望來這裡吃下午茶自助餐,結果我花了很多口水,阻也阻不了,仲即場幫佢訂埋位,唯有祝君好運吧 =[

大飽口福
銅鑼灣告士打道250-254號伊利莎伯大廈2樓

2 則留言:

  1. 大年初一, 估唔到有一個咁慘烈嘅 post....
    我介紹返一間舖頭俾你啦, 佢係一間刺身壽司外賣店, 你去開女朋友屋企時可以訂,
    基本上好多所謂日本食店的貨, 佢都有得賣,
    我年年開 party 都買, 價錢一定抵過你出去食好多好多!
    http://startat712.blogspot.com/2010/12/u-mates.html

    http://www.yl.com.hk/ek/index.htm

    希望你下次食返餐開開心心的, 龍年真的可以大飽口福!

    回覆刪除
  2. re: 波比太太

    新年快樂呀,嘩,碟帶子太吸引了!!! 搵日要幫襯下先得,謝介紹!

    回覆刪除

LinkWithin

Related Posts with Thumbnails