2012/01/22

噹噹燒。團購消費,典型次等享受?

團購是近年新興的消費模式,從餐廳角度來說,以特惠價錢吸引食客,一來可刺激生意,二來亦是一種宣傳,成本遠比賣廣告低,看似百利而無一害,但其實 「成也團購、敗也團購」,店方很多時只顧表面的風光,完全不明白團購的真諦,仍然堅守一分錢一分貨的原則,價錢,是便宜了,但換來的質素也大打折扣,結果大有撥自己冷水的感覺,而我最近在尖東噹噹燒的經歷,就是這種次等待遇的例證。

從 Yahoo 團購以 $119 買下了原價 $238 的噹噹燒十週年大阪燒 2 人晚市套餐,當時已知道需三天前預訂座位,以及支付剩餘的 $24 加一服務費,從食評網站研究了一會,最後還是覺得值得一博。明知團購反應熱烈,預早一星期訂好晚上七時的座位,過程尚算順利,以為今舖唔會中伏,點知...


二人準時到達,當時小店還未坐滿,店員問我介不介意坐在店舖後面的位置,原來那邊是專為團購客人而設的「特區」。「團購特區」設有四張二人檯,檯的一半是在店舖外的,換句話說,我們當時是坐在商場內的走廊位,無錯,訂好位都要坐走廊!雖然港晶中心人流不旺,但面對如此「開放」的用膳環境,我覺得自己就像餐廳的「二等公民」,又或者買了演唱會 $100 平飛,註定坐山頂睇大螢幕的無奈感覺。

店內的確大把空位,有咩理由要我坐走廊?!
店員主動拿了兩個不同的餐牌過來,第一個是我們團購的 2 人晚市套餐,另一個則是小吃餐牌,還未看清 2 人套餐的內容,她便問:「使唔使額外叫多 d 小食?而家做緊團購特惠,一客 $35,兩客 $59,每檯最多叫兩客。」當時情況十分奇怪,莫非 2 人套餐份量唔夠食,點解咁快 sell 小吃呢?

最後,我們決定先點好 2 人套餐,點知店員劈頭的第一句又係加錢,「請問噹噹燒要唔要加蛋或麵餅,加蛋加 $10,加麵餅加 $24。」大佬,我知我係用半價幫襯,使唔使下下 sell 到咁盡?


沙律二選一,龍蝦或北寄貝,點了後者,結果來的份量根本不是二人份,少得可憐,而且沙律以椰菜為主,北寄貝切至幼無可幼,當中夾雜的爽口感覺完全來自海草,對此,也只能讚一句「好刀功」!


木魚湯是個笑話,味道清淡如水,內裡亦只得兩丁豆腐粒和極稀有疑似海帶物,三秒喝光不留痕跡,利害過 3M 出品。


前菜選擇了秋田走地炸雞,一客四件,大有「謝主隆恩」之感,雞件炸得熱辣辣,外層夠香夠脆,肉汁所餘無幾,幸亦未至於粗嚡得難以入口。


串燒一共兩款,每款兩串,分別要了雞串及金菇牛肉卷,前者味道正常,雞肉塗上甜甜的燒汁,不難入口,但金菇牛肉卷則十分粗皮,牛肉捲著的金菇只得三數條,其餘竟全是椰菜絲!!!


千辛萬苦,這個號稱材料豐富的「超級噹噹燒燒餅」終於上檯,但說好的鮑魚、扇貝不見踪影,只看到面頭的木魚絲和沙律醬,瑤柱或許有吧,但重要嗎?反正入口全是粉粉的感覺,至於蝦和粟米?無花無假,真係落到足,偏偏另加的麵餅太過「一 pat pat」,如果沒有期望的話,這中小程度的噹噹燒還算合格,但...那一刻,我非常掛念銅鑼灣 Kozy 的出品!


甜品本來有個紅豆汁燒年糕幾有趣,偏偏是日沒有供應,只得「雪之綠茶和果子」,名字多麼的動聽啊...

買單連加一需另付 $51,你問係咪非常抵食?唔係!質素係咪非常好?唔係!服務算係咁喇卦?Sorry,都唔係!團購明明是有效的宣傳手法,結果卻變成店方倒米大行動,團購客也是客,有乜理由要人坐走廊?絕對無下次!

噹噹燒
尖沙咀加連威老道100號港晶中心42B-44A地舖

2 則留言:

  1. 極之同意!餐廳不是希望利用團購較低價錢去吸引客人作出第一次嚐試嗎?若對食物及服務滿意自然會回頭,但之前的團購經驗都不太好,食物質素一般,有些服務態度又差,這樣為何還辦團購,帶來反效果好似更大。

    回覆刪除
  2. re: Chocolate muimui

    對,有時候係店方能力有限,勉強去做團購,結果又要將貨就價,唉~

    回覆刪除

LinkWithin

Related Posts with Thumbnails