2010/11/07

迷你午餐

於灣仔觀禮後,大伙兒漫無目的下,去了平時成日經過,卻又未曾幫襯過的波士頓餐廳。

是日午餐兩款選擇,分別是燒黑豚肉 ($52) 及焗芝士雜菌肉醬螺絲粉 ($49),同時也供應鐵板套餐,價錢一百蚊左右,但大家都唔想食得太貴,最後一人一個 set lunch 就算。

點餐後,侍應隨即送上甜包及餐湯,包拿上手夠熱夠軟熟,夾牛油吃更佳,而湯則是粟米紅腰豆忌廉湯,質感不會「杰撻撻」,幾對胃口的。

主菜燒黑豚肉,本來是跟蒜蓉汁的,但侍應上菜時已淋上了黑椒汁,也沒所謂吧。餐牌指明是「迷你鐵板」,原來份量真係好迷你,圓形鐵板可愛,而豬柳只是細細的一件,幸肉質腍軟,連著肥脂邊位,味道算幾討好,但的確唔太夠飽,而伴碟的薯條和雜豆也非常普通,薯條更是硬而不脆的,大可不理。

焗芝士雜菌肉醬螺絲粉賣相就更迷你,看來也不是即焗的,肉醬還肉醬,螺絲粉還螺絲粉,前者很乾,後者軟腍腍,味道也偏淡口,整體連快餐店的質素也不如!

突然想起對面馬路的榮興小廚,有點自責,點解唔去食蔥油雞呢?

波士頓餐廳
灣仔盧押道3號地下

沒有留言:

發佈留言

LinkWithin

Related Posts with Thumbnails