2010/10/25

海南闊少

平日夜晚,本打算收工拿拿聲同女友入場睇戲,奈何時間太趕,加上抵不了肚餓,最後還是決定以食為先。人在世貿,自然想起人氣熱店海南少爺,據說每晚都要大排長龍,但見女友有張七折卡,一於上去碰碰運氣。

可能是因為時間尚早,門口竟沒有人龍,店內更有不少空位,結果二人直行直入,真走運。看看餐牌,當然要試試此店招牌的海南雞飯,定價 $88,再要一客精選海鮮喇沙,同樣收 $88,是幾近酒店級別的價錢,心裡不禁在想,究竟係咪真係咁好食?

先說海南雞飯,包括了海南雞、油飯、菜及雞湯,雖然沒有加 $10 要全脾,但雞肉尚算腍滑,皮不太厚,但有少少離肉的情況,先沾上杰杰的黑醬油後,再沾上酸辣醬薑茸,味道變得更加吸引,感覺是不錯的。呈微黃色的油飯看來十分對辦,夾起夠乾身,第一口亦相當入味,但一直吃,卻發覺部份飯粒明顯較硬,口感不一,有點奇怪。

至於雞湯則用壺上,另再放了些杞子在杯內,用時倒出來飲,幾有心思,湯本身無落味精,味道夠清,又未至淡而無味,絕對收貨,唯一敗筆的是那碟青菜,質地有點嚡有點老,相當普通。

精選海鮮喇沙 ($88) 價錢已經不算便宜,但其實還有一款更高昂的皇牌龍蝦喇沙 ($168),實在有點誇張,可幸的是份量十足,賣相吸引。喇沙可選米粉、瀨粉或雙併,我們選擇了雙併,貪其雙重口感更為豐富,材料則包括了標準的蝦、魚蛋、魚片、豆卜等,當中以魚蛋最好食,入口夠彈牙,反而蝦肉竟然有點霉,有點失望。呈橙色的湯底夠鮮,也富奶香,如再落些森巴醬同吃,味道會更為突出。


買單加一後七折約 $140,感覺還可以,但如果正價的話,就要好好考慮,女友話齋,在這裡一百蚊食一碗喇沙,倒不如去土司工房吃兩碗,起碼隻蝦唔會霉...

海南少爺
銅鑼灣告士打道280號世貿中心3樓311號舖

沒有留言:

發佈留言

LinkWithin

Related Posts with Thumbnails