2010/07/17

常餐 = 特餐 = 晚餐

響迪士尼玩完整個下午,拖著累透的身體搭地鐵出深水涉,胃口卻沒有想像中的大,心諗最好面前有個澳牛常餐,簡簡單單食完立即回家大昏迷,可惜澳牛實在離我們太遠,還是在附近找間茶記比較實際!

行到去西九龍中心斜對面的汝州街,終於搵到幾間茶記,其中最「四正」的就是九龍餐室,勝在環境夠晒光猛,仲有部 LCD 電視送飯,我們也不多作考慮,一於入去試試。

女友要了「心意特餐」,包括牛油厚多士、西班牙奄列、芝士腸拼雞中翼配通粉,連餐飲共 $38,價錢其實不算便宜,但陣容來說實在豐富得很。所謂「西班牙奄列」,材料分別有彩椒、洋蔥及煙肉,全放在煎得薄薄的蛋皮內,果然幾有誠意。這店所用的芝士腸不是脆皮的那種,而炸雞翼睇落好似普普通通,其實夠晒熱辣燙口,亦能鎖住內裡的肉汁,相當出色!

我偏愛炒粉麵飯,這次要了沙爹牛肉炒河 ($43),河粉炒得爽滑,部份帶少許燶邊,証明蠻具鑊氣,沙爹醬下得恰到好處,加上青椒、紅椒、菠蘿、芽菜等配料,賣相及味道皆屬水準以上,而且份量大大碟,相信足夠二人共享的,值得一讚!


餐飲叫了兩杯凍奶茶,其中一杯要少甜,沖得夠滑有茶味,只係覺得「少甜」和「正常甜」的差距實在不大,相信店方在這方面可以再做得更好的,始終掛名都是一間餐室嘛!

九龍餐室
深水埗汝州街282號地下

沒有留言:

發佈留言

LinkWithin

Related Posts with Thumbnails