2010/07/07

泗哥有性格!

近排天氣炎熱,站在街上也覺得辛苦,雖然喜歡大牌檔的風味,暫時也只好迴避一下,想起仍未寫陳泗記的食評,趁等睇波的時間回一回帶吧。三月尾,本想幫襯盛記大牌檔,可惜人客實在太多,連近樓梯的位置也擠滿了人,不知要呆等到何時,肚子太餓,唯有改去鄰檔陳泗記試試。


我們一坐底即自動波清洗碗筷,並從餐牌上揀好兩道小菜,可惜等了又等,遲遲都未有伙計上前招呼,明明全場只得兩三檯客,他們卻好像分身不睱似的,偏偏我又不知道他們在忙甚麼,完全沒有大牌檔應有的快、狠、準!


等了約十五分鐘,終於可以落單,我們要了生炒咕嚕肉 ($48) 和沙爹牛肉炒芥蘭 ($46),另加一碗白飯 ($6)。這裡的餸菜,由準備材料到落鑊炒,整個流程全是老闆泗哥一手包辦,始終他一人只得雙手,為此稍等一會也沒有所謂。


先來的是咕嚕肉,賣相普普通通,配料包括青椒、番茄粒、洋蔥及菠蘿,但份量又不覺豐富,幸咕嚕肉外脆,肉質又夠腍軟,調味酸甜得宜,相當不錯。另一味沙爹牛肉炒芥蘭,牛肉不太腍滑,芥蘭就夠晒爽脆,而沙爹汁雖然煮得比較稀,味道卻十分濃郁,用來撈飯吃都幾開胃的。


泗哥炒完餸,可能見到我舉機影相,就過來吹吹水,講開碟沙爹牛肉炒芥蘭煮得夠入味,佢先慨歎網上有人彈佢炒得唔靚 (翻查紀錄,2008 年的確有食評咁寫過),然後表示坊間的沙爹牛肉通常都係落沙爹醬,但又無煮稀個醬,試問芥蘭又點會入味呢?

坦白講,這裡的服務效率實在不敢恭維,但老闆泗哥如此有性格,也值得我們尊重!

陳泗記
中環士丹利街74號

2 則留言:

LinkWithin

Related Posts with Thumbnails