2010/06/26

金鐘平價飯盒



即使慣了每天帶住家飯盒返工,間中也會因為出門太匆忙而漏招,記得食友陳真介紹的逸盧餐廳有平價外賣飯盒供應, 一於去買個試試。

逸盧餐廳位於中信大廈四樓,屬中檔次的法國菜餐廳,但同時供應外賣飯盒,吸納附近返工的白領,每日有兩款飯盒供應,星期四的選擇分別是咖哩雞飯及 BBQ 汁豬扒飯,連飲品只需 $25,十分抵吃,但竟然無乜人幫襯,反觀樓下大家樂場面墟冚,人龍更排到出門口,認真搵食艱難,想「搵」個飯盒「食」都「難」,點解佢地唔上多一層呢?

我要了 BBQ 汁豬扒飯,所謂的 BBQ 汁,是在燒汁內加了一些番茄粒和酸瓜粒,味道酸酸甜甜的,寧舍開胃。豬扒灑上一些胡椒,肉質鬆化,而連骨的那條脂肪邊更是美味,也比一般的飯盒有誠意。由於中信大廈位置比較偏僻,外賣拎到返公司食,飯底只得半暖,好彩入口唔會軟淋淋,而且有些椰菜作伴,吃起來不會太寡。買飯盒附送罐裝可口可樂,都幾慷慨,可惜雪得唔夠凍,下次幫襯的話,還是選擇跟例湯好過!

逸盧餐廳
金鐘添美道1號中信大廈401號鋪

2 則留言:

  1. 中午搵食真係最緊要快, 個飯盒都好似好食喎, 好肚餓...

    回覆刪除
  2. RE: Jules
    無錯,中午食飯最緊要平、靚、正 ^~^

    回覆刪除

LinkWithin

Related Posts with Thumbnails