2010/04/18

始終都有第一次

從未吃過維記潤牛麵,尋日心血來潮,終於甘心去排隊,獻出我的第一次。下午兩點幾,維記三間店鋪門外都排著一條不短的人龍,人氣的確爆燈,可幸的是小店覆桌率高,等了十五分鐘就有位。


一坐低,唔使睇餐牌研究,立即同阿姐講「潤牛麵、牛肉通、咖央西多、凍茶少甜、凍鴦唔該」,幫襯茶檔,最緊要快!


先黎既竟然唔係粉麵類,而係咖央西多 ($12),或者因為檯檯都會叫,只好一直大量生產。這裡的西多不是單純落油鑊炸,而是細火慢煎,考的是店方的心思,咁好生意,仍然堅持慢工出細貨,實屬難得,味道也當然大有不同,明顯吃得出一層薄薄的煎蛋,緊緊黏在多士之上,聞落好有蛋香,咬入去充滿咖央的椰味,甜度適中,是個出色的作品!


潤牛麵 ($24) 緊接來到,重點應該放在湯底之上,湯面浮著一層白泡,不要誤以為是肥油,其實是大火滾出來的效果。清徹如鏡的湯底,呷一口,牛味潤味並重 (死火,突然覺得自己變左麗梅姐),同時也下了薑,以辟去豬潤的腥,換來一份清甜,如果不是配了公仔麵,怕那些防腐劑,我應該會把它一喝而盡。材料方面,豬潤是新鮮貨,厚薄剛好,滑溜而粉感十足,如可再爽口一些會更好;牛肉則只是普通貨色,有點韌有點老;麵則比較淋滑,應該是大光麵,下次只要豬潤通 ($22) 就行了,價錢更抵!


快快手手飲晒杯凍鴦 ($11),叫阿姐結數,拍拍屁股走人 (咁當然我無拍啦~),感覺爽丫丫!

維記咖啡粉麵 (評分 7)
深水埗北河街165-167號地下

沒有留言:

發佈留言

LinkWithin

Related Posts with Thumbnails