2010/04/17

原來是她媽的味道

近日我的體重直線上升,心知係時候開始節制一下,要吃得清淡一點,正好看到食友蝗蟲同學介紹的阿媽靚湯米線,其健康的住家味道,正合我意。阿媽是一間基督教食店,店內放了不少宗教書籍供客人取閱,餐牌也寫上歌頌耶和華的字句,環境則是一般茶餐廳的格局,但空間寬敞,都算坐得幾舒服。


阿媽靚湯跟餐價六蚊碗,是日的沙參玉竹蘋果煲瘦肉,是我家裡少見的配搭,無添加的味道十分清甜,生津解渴之選,店方表示湯水用了鹼性還原水去煲,莫非就係電視大賣廣告的 Diamond water?其實我唔太飲得出有咩分別。


另加十二蚊的雞絲青瓜,幼滑雞絲混上適量的麻醬芝麻,但墊底的青瓜切得太薄,感不夠爽脆,水準只是一般。


新鮮手打鯪魚肉、番茄薯仔湯飯 ($32),配料包括手打鯪魚肉,原個番茄、娃娃菜及唐生菜等,湯的色水不深,味道卻來得十分鮮甜,果然是真材實料。至於手打的鯪魚肉,內裡夾雜不少香蔥,可惜質感比較實,如果可以做得彈牙少少會更好。


另加六蚊的太子飯,是這裡的招牌,以粟米粒、菜粒、南瓜粒、沙葛粒、蛋絲與白米、紅糙米混成,纖維相當高,值得一試。


鰻魚汁肥牛飯 ($32),本以為是不太健康的選擇,想不到粟米和生菜下得比牛肉更多,大約六四之比。每日以人手剝的新鮮粟米粒,吃得到果皮、胚尖及粟米蘇,用來撈飯吃,讓鮮甜的粟米粒在口中爆開,感覺一流。本是主打的肥牛頓成配角,幸其厚度適中,肥脂也不多,加上味道帶甜的鰻魚汁,效果不錯。



總的來說,阿媽靚湯米線的味道清淡,用料健康,煮得亦夠用心,雖然跟我媽煮出來的大有不同,卻有點像她媽媽的住家菜呢!
 
阿媽靚湯米線 (評分 6)
太子太子道西100號地下

沒有留言:

發佈留言

LinkWithin

Related Posts with Thumbnails