2010/01/03

我在街邊餃餃震

上星期二晚,去油麻地電影中心睇 <<十月圍城>>,八點半場,先在附近找東西吃,剛好記得新填地街有間不太起眼的餃子店,店子小小,以外賣生意為主,座位設在街上,水餃即包即煮,看似風味十足,於是在攝氏 14 度的寒風下「餃餃震」。

走進店內同阿姐下單,要了北京炸醬冷麵 ($28)、羊肉餃 ($33) 及芝麻雞絲粉皮 ($28),阿姐問芝麻雞絲粉皮要唔要辣,恕我膚淺,從未嚐過辣的雞絲粉皮,保守一點要小辣試試。

等了一會食物便送來,阿姐人很熱情,提示我們炸醬味道偏鹹,所以下的份量不多,如果發覺唔夠味的話,可以再加醬。先撈起冷麵,麵上的青瓜絲及紅蘿蔔絲很多,炸醬味道鹹得剛好,並不過火,但撈勻後覺得色水不夠,再加了一丁點,麵條口感像上海麵,入口帶點煙韌,涼浸浸的,味道清新,夏天吃應更合時。

芝麻雞絲粉皮是另一涼菜,少辣只是虛名而已,芝麻、麻醬下得多,聞落很香,雞絲、青瓜絲及紅蘿蔔絲切得幼身,粉皮滑溜,沒有「碎濕濕」之感,加醋撈起,味道變得更有層次,有水準,值得一試。

天寒地凍,最好就係食羊肉餃暖暖身,由老婆婆親手包製,水餃皮的厚度做得剛好,羊肉餡混合了紅蘿蔔粒,羶味濃而不烈,若配合加了蒜頭的醋,味道更加突出,也不錯。阿姐熱情推介薑汁豆漿 ($8),要了一杯,豆漿內有些薑粒,第一口薑味勁搶,然後豆香慢慢湧現,質感亦夠順喉。

吃罷,行過電影中心不用五分鐘,非常方便,應該有下次。

北京人館子 (評分 6)
油麻地新填地街200號E舖

沒有留言:

發佈留言

LinkWithin

Related Posts with Thumbnails