2009/12/19

我好旺角?


Happy Friday,女友提議去旺角行街食飯,剛好睇到南瓜兄好旺角的食評,炸醬撈粗看似十分吸引,就一於去做個「好 MK」。好旺角位於旺角中心對面,不難找,時約七點,麵店已經半滿,好彩剛好有卡位。殘舊的裝修是歷史的見証,但頭上不時有烏蠅飛過,就真係有點惡頂,環境衛生要扣點分數。

招牌炸醬撈粗可叫一碗 ($22) 或一碟 ($33),碟大約多碗半個麵餅,炸醬份量較多,作為是日晚餐,就要一碟試試。先將鮮紅色的炸醬倒在粗麵上,灑些清湯拌勻,賣相立即靚仔晒。粗麵入口幾滑溜的,不覺有鹼水味,炸醬十分濃郁,味道甜中帶小辣,惹味開胃,肉絲偏瘦而入味,連最基本的清湯也有豐富的蝦籽味,感覺不錯。

女友點了雲吞麵 ($22),竟將五粒雲吞分了三粒給我,雲吞小,沒有拖尾的雲吞皮,內含鮮蝦,肉的比例雖較少,入口卻味道十足,有點驚喜。要了一碟芥蘭 ($12),沒有下蠔油,粗身菜莖煮得軟淋,亦沒有苦澀味。

順道介紹一下新事物,響好旺角街口轉角的 7-11 發現了「即叮心太軟」,龍堡出品,價錢只是 $9.9,忍不住試了一個,放入微波爐略叮十秒即成,方便快捷。

不到十蚊的貨仔,要求不可太高,即叮心太軟的蛋糕弄得太厚,故朱古力醬的流心度只是一般,畫面一點也不澎湃,味道一瞬即逝,不太痛快,但如果突然甜魔癮起,即興去 7-11 啪番個都未嘗不可。

好旺角麵家 (評分 6.5,環境 2.5)
旺角西洋菜街146號

沒有留言:

發佈留言

LinkWithin

Related Posts with Thumbnails